शिशुमंदिर - शालेय उपक्रम

पदवीदान समारंभ

मंगळवार दिनांक १०/४/२०१८ रोजी मोठ्या गटाचा पदवीदान समारंभ संपन्न झाला. मोठ्या गटामधून इयत्ता पहिली मध्ये जाणाऱ्या विद्यार्थिनींना शुभेच्छा देण्यासाठी उपक्रम राबवण्यात आला तो म्हणजे पदवीदान समारंभ. हा पदवीदान समारंभ मोठ्या दिमाखदार पद्धतीने पार पडला. सर्व विद्यार्थिनींनी पदवीदान समारंभाचे पोशाख परिधान केले होते.

"एक, दोन, तीन, चार हुजूरपागेचा जयजयकार"

"गुलाब, मोगरा, सायली, अबोली हुजूरपागेच्या हुशार मुली”

अशा घोषणा देत सुखसागरनगर परिसरात रॅली काढण्यात आली. कार्यक्रमाची सुरवात गुरुवंदनेने झाली. गुरुवंदना सादर केली छोट्या गटातील चिमुकल्या विद्यार्थिनींनी. तसेच विद्यार्थिनींना मान्यवरांच्या हस्ते सन्मानपत्र आणि पदक देऊन गौरवण्यात आले. ह्यावेळी महाराष्ट्र गर्ल्स एज्युकेशन सोसायटी हुजूरपागा कात्रज शिशुमंदिर विभागाच्या शालेय समिती अध्यक्ष माननीय श्रीमती वंदना पाठक, संस्थेचे सभासद माननीय श्री. सोनावणी, श्रीमती वर्षा गजेंद्रगडकर, प्राथमिक विभागाच्या मुख्याध्यापिक माननीय श्रीमती रंजना नाईक, इंग्लिश मिडीयम मुख्याध्यापिका माननीय श्रीमती पुरोहित उपस्थित होत्या. कार्यक्रमामध्ये शिशुरंजन आणि छोट्या गटातील विद्यार्थिनींनी भाषणाद्वारे मोठ्या गटातील विद्यार्थिनींना शुभेच्छा दिल्या तर मोठ्या गटातील विद्यार्थिनींनी भाषण करून मान्यवरांची मने जिंकली. संस्थेचे सभासद माननीय श्री. सोनवणी ह्यांनी विद्यार्थिनींना बक्षीस दिले.

शुभेच्छा समारंभ

मंगळवार दिनांक ३/४/२०१८ रोजी मोठ्या गटाचा शुभेच्छा समारंभ साजरा करण्यात आला होता. छोट्या गटातील आणि शिशुरंजन गटातील विद्यार्थिनींनी नृत्य सादर केले. तसेच मोठ्या गटातील विद्यार्थिनींसाठी शुभेच्छा पत्र आणि वॉलपिस तयार केले. छोट्या गटातील विद्यार्थिनींनी मोठ्या गटातील विद्यार्थिनींसाठी लिंबू सरबत तयार करून दिले.

विज्ञान प्रदर्शन, अक्षर जत्रा, गणित जत्रा

शुक्रवार दिनांक २३/३/२०१८ रोजी शिशुमंदिर विभागात विज्ञान प्रदर्शन भरवण्यात आले, विद्यार्थिनींनी सूक्ष्मदर्शक, लोहचुंबक, तरंगणे बुडणे, प्रकाश सरळ रेषेत जातो अशा विविध प्रयोगांची माहिती प्रात्यक्षिकांद्वारे सांगितली. तसेच भाषा आणि गणित विषयासंबंधी विविध खेळ शिक्षकांनी तयार करून मांडले होते. पालकांनी पाल्यासोबत ह्या खेळांचा आनंद लुटला. खेळाद्वारे अक्षरज्ञान आणि अंकज्ञान ह्या उदेशाने ह्या प्रकल्पाचे आयोजन करण्यात आले होते. पालकांनी ह्या प्रकल्पास भरघोस प्रतिसाद दिला.

गुढी पाडवा

गुरुवार दिनांक १५/३/२०१८ रोजी शिशुमंदिर विभागात गुढी पाडवा हा सण साजरा करण्यात आला. सर्व विद्यार्थिनी आवडीचा पोशाख करून आल्या होत्या. छोट्या गटामधील विद्यार्थिनींनी माहिती सांगितली आणि नृत्य सादर केले. मुख्याध्यापिका उमा गोसावी ह्यांनी गुढीचे पूजन केले. खाऊ म्हणून विद्यार्थिनींना साखरेच्या गाठी देण्यात आल्या होत्या.

रंगपंचमी

मंगळवार दिनांक ६/३/२०१८ रोजी शिशुमंदिर मध्ये रंगपंचमी सण साजरा करण्यात आला. हळद, बीट ह्यापासून नैसर्गिक रंग तयार करण्यात आले होते. नैसर्गिक रंग वापरून विद्यार्थिनींनी रंगपंचमी साजरी केली. छोट्या गटामधील विद्यार्थिनींनी नृत्य सादर केले. पाण्याचा अपव्यय टाळा हा संदेश माहितीद्वारे देण्यात आला.

पिवळा रंग दिन

बुधवार दिनांक २१/२/२०१८ रोजी शिशुमंदिर मध्ये पिवळा रंग दिन साजरा करण्यात आला. शिशुरंजन गटामध्ये पिवळ्या रंगाच्या वस्तूंची मांडणी करण्यात आली होती. सर्व विद्यार्थिनी पिवळ्या रंगाचे पोशाख करून आल्या होत्या. खाऊ म्हणून विद्यार्थिनींना पोह्यांचा चिवडा देण्यात आला.

फुलपाखरू उद्यान सहल

शुक्रवार दिनांक २३/२/२०१८ रोजी मोठ्या गटाची सहल फुलपाखरू उद्यान, सहकार नगर येथे नेण्यात आली होती. कीटक प्रकल्पांतर्गत ह्या सहलीचे आयोजन करण्यात आले होते. विविध प्रकारची फुलपाखरे विद्यार्थिनींना दाखवण्यात आली. तसेच फुलपाखरांचा जीवनक्रम चित्राद्वारे सांगण्यात आला.

पालक कार्यशाळा

गुरुवार २२/२/२०१८ रोजी शाळेमध्ये पालकांसाठी कार्यशाळा आयोजित केली होती. एस. एन. डी. टी. गृहविज्ञान महाविद्यालयाच्या विद्यार्थिनींनी कार्यशाळेचे आयोजन केले होते. विविध हस्तव्यवसाय कृती, पाककृती, गाणी, खेळ ह्यामधून पालकांचे मनोरंजन करण्यात आले. त्यानंतर माननीय श्रीमती अनुपमा देसाई ह्यांनी पालकांना 'सुजाण पालकत्व' ह्याविषयावर मार्गदर्शन केले. विद्यार्थिनींच्या विकासामध्ये पालकांचा सहभाग महत्वाचा असतो ह्या उद्देशाने ह्या पालक कार्यशाळेचे आयोजन केले होते.

जांभळा रंग दिन

बुधवार दिनांक १४/२/२०१८ रोजी शिशुमंदिर मध्ये जांभळा रंग दिन साजरा करण्यात आला. छोट्या गटामध्ये जांभळ्या रंगाच्या वस्तूंची मांडणी करण्यात आली होती. लाल आणि निळा रंग एकत्र करून जांभळा रंग तयार होतो हे प्रत्यक्ष दाखवण्यात आले. सर्व विद्यार्थिनी जांभळ्या रंगाचा पोशाख परिधान करून आल्या होत्या. गोकर्ण फुलाच्या आकारात ठसेकाम हि कृती विद्यार्थिनींकडून करून घेण्यात आली.

पालक स्पर्धा

गुरुवार दिनांक ८/२/२०१८ रोजी पालकांसाठी स्पर्धेचे आयोजन करण्यात आले होते. पालकांमध्ये असणाऱ्या कलाकौशल्यांना वाव मिळावा ह्या उद्दिष्टाने स्पर्धा आयोजित केल्या होत्या. शिशुरंजन गटातील पालकांसाठी शाडू मातीपासून फळे बनवणे. छोट्या गटातील पालकांसाठी फुलांपासून दागिने बनवणे तर मोठ्या गटातील पालकांसाठी कागदापासून घडीकामातून पक्षी बनवणे अशा स्पर्धा घेण्यात आल्या. स्पर्धेमध्ये पालकांनी उत्स्फुर्तपणे सहभाग घेतला आणि कल्पकतेने खूपच छान वस्तू बनवल्या. प्राथमिक विभागाच्या मुख्याध्यापिका माननीय श्रीमती रंजना नाईक, प्राथमिक विभागाच्या कला शिक्षिका श्रीमती तुप्ती खैरे ह्यांनी स्पर्धेचे परीक्षण केले. विजेत्यांना पालक सभेदिवशी बक्षिसे देण्यात आली.

कीटक प्रकल्प (मोठा गट)

गुरुवार दिनांक ८/२/२०१८ रोजी मोठ्या गटामध्ये कीटक प्रकल्पाची मांडणी करण्यात आली होती. कीटकांचे प्रकार, त्यांचे अवयव, उपयोग, रोग पसरवणारे कीटक त्यांची घरे अशी विविध प्रकारची माहिती चित्रे, मोडेल्स, तक्ते ह्याद्वारे देण्यात आली होती. मांडणी पाहण्यासाठी पालकांची उपस्थिती लक्षणीय होती.

गुड टच बॅड टच प्रशिक्षण

मंगळवार दिनांक ६/२/२०१८ रोजी शिशुमंदिर मधील सर्व विद्यार्थिनींना बालविकास आणि महिला सबलीकरणासाठी काम करणाऱ्या यु. एस. के. संस्थेतर्फे गुड टच बॅड टच प्रशिक्षण देण्यात आले. शिशुमंदिर मधील विद्यार्थिनी ह्या अतिशय लहान असतात. बाह्यजगामध्ये शाळेच्या निमीताने प्रथम पाऊल टाकतात. बाहेरील जगामध्ये विद्यार्थिनी सुरक्षित रहाव्या तसेच त्यांनी स्वतःचे स्वतः संरक्षण करावे ह्या उदिष्टाने शिशुमंदिर विभागात प्रशिक्षण देण्यात आले. शिशुमंदिर मधील विद्यार्थिनींच्या वयास समजतील अश्या पद्धतीने चित्राद्वारे आणि फिल्मद्वारे छान माहिती सांगण्यात आली.

फळे प्रकल्प मांडणी

गुरुवार दिनांक १/२/२०१८ रोजी शिशुरंजन गटामध्ये फळे प्रकल्प मांडणी करण्यात आली होती. फळांचे विविध प्रकार, उपयोग, फळांच्या बियांची नावे, त्यांचे रंग अशी विविध माहिती देणारे तक्ते ह्यांची मांडणी करण्यात आली होती. मांडणी बघण्यास विद्यार्थिनींसोबत पालक उपस्थित होते.

फुले प्रकल्प

गुरुवार दिनांक १/२/२०१८ रोजी छोट्या गटामध्ये फुल प्रकल्प मांडणी करण्यात आली होती. फुलाचे प्रकार, फुलांचे उपयोग, तक्ते, चित्रे ह्यांची मांडणी करण्यात आली होती. पालक उत्स्फुर्तपणे मांडणी बघण्यासाठी उपस्थित होते.

भोसरी उद्यान सहल

सोमवार १५/१/२०१८ रोजी मोठ्या गटाची सहल भोसरी उद्यान येथे नेण्यात आली होती. तेथे विद्यार्थिनींनी घसरगुंडी, झोका, जंगलजीम अशा विविध खेळांचा मनसोक्त आनंद लुटला. तसेच फुलराणीमधून बागेची सफर केली. खाऊ म्हणून विद्यार्थिनींना मेथी पराठा, सॉस, लाडू देण्यात आला.

एम्प्रेस गार्डन सहल

शनिवार १३/१/२०१८ रोजी शिशुरंजन आणि छोट्या गटाची सहल एम्प्रेस गार्डन येथे नेण्यात आली होती. झोका, जंगलजीम, घसरगुंडी ह्या खेळांचा आनंद विद्यार्थिनींनी लुटला. विविध प्रकारच्या झाडांची माहिती देण्यात आली. खाऊ म्हणून विद्यार्थिनींना मेथी पराठा, सॉस, लाडू देण्यात आला.

काळा रंग दिन (मोठा गट)

शुक्रवार दिनांक १२/१/२०१८ रोजी मोठ्या गटामध्ये काळा रंग दिन साजरा करण्यात आला. तसेच सर्व विद्यार्थिनी काळ्या रंगाचा पोशाख परिधान करून आल्या होत्या. विविध काळ्या रंगांच्या वस्तूंची मांडणी करण्यात आली होती. काळ्या रंगाच्या कोळी किटकाचे चित्र विद्यार्थिनींनी रंगवून त्यापासून स्पिनर हा खेळ तयार केला.

पक्षी आणि व्यावसायिक लोक प्रकल्प

गुरुवार दिनांक १८/१/२०१८ रोजी मोठ्या गटासाठी पक्षी आणि व्यावसायिक लोक या विषयाची मांडणी करण्यात आली होती. पक्षी, घरे, खाद्य, पक्ष्यांचे अवयव आणि प्रकार तसेच व्यावसायिक लोक साहित्य त्यांची चित्रे अशी विविध मांडणी करण्यात आली. मांडणी पाहण्यासाठी संस्थेच्या अध्यक्ष माननीय श्रीमती शामा जाधव आणि संस्थेच्या सचिव माननीय श्रीमती रेखा पळशीकर आवर्जून उपस्थित होत्या.

हिवाळा प्रकल्प मांडणी

गुरुवार दिनांक १८/१/२०१८ रोजी शिशुरंजन गटाच्या अभ्यासक्रमातील हिवाळा प्रकल्पाची मांडणी करण्यात आली होती.हिवाळा ऋतूमध्ये येणारे सण, हिवाळ्यामध्ये वापरण्यात येणारे कपडे, खाल्ले जाणारे पदार्थ अशा विविध वस्तूंची मांडणी शाळेत करण्यात आली होती. पालकांनी मोठ्या प्रमाणात मांडणी पाहण्यासाठी उपस्थिती दर्शवली.

वाहने आणि पाण्यातले जग प्रकल्प मांडणी

गुरुवार दिनांक १८/१/२०१८ रोजी छोट्या गटामध्ये वाहने आणि पाण्यातले जग ह्या प्रकल्प विषयांची मांडणी करण्यात आली होती. विविध वाहने, त्यांचे प्रकार, वाहतुकीचे नियम, पाण्यातले प्राण्याचे विविध प्रकार, त्यांचे अवयव, उपयोग अशी माहिती देणारे मोडेल्स, तक्ते, चित्रे मांडण्यात आली होती. पालकांनी उत्साहाने विद्यार्थिनीसोबत मांडणी बघण्यास उपस्थिती दर्शवली.

मकर संक्रांत

शुक्रवार दिनांक १२/१/२०१८ रोजी शिशुमंदिर विभागात मकर संक्रांत साजरी करण्यात आली. सर्व विद्यार्थिनी काळ्या रंगाचे पोशाख परिधान करून आल्या होत्या. शिशुरंजन गटातील विद्यार्थिनींचे बोरन्हाण करण्यात आले. छोट्या विद्यार्थिनींना हलव्याचे दागिने घालण्यात आले होते. गोळ्या, बिस्कीट, चुरमुरे, बोर असे विविध पदार्थ एकत्र करून मोठ्या उत्साहात बोरन्हाण करण्यात आले. तसेच ऊस, रेवडी, बोर हा खाऊ विद्यार्थिनींना देण्यात आला.

आबा बागुल उद्यान (शिशुरंजन गट)

शुक्रवार दिनांक २२/१२/२०१७ रोजी शिशुरंजन गटाची सहल आबा बागुल उद्यान येथे नेण्यात आली. तेथील खेळाचा आनंद विद्यार्थिनींनी घेतला. तसेच शेंगदाण्याचा लाडू खाऊ म्हणून देण्यात आला.

रेल्वे म्युझियम (छोटा गट)

शुक्रवार दिनांक २२/१२/२०१७ रोजी वाहने प्रकल्पांतर्गत छोट्या गटाची सहल कोथरूड येथील रेल्वे म्युझियम येथे नेण्यात आली होती. तेथे रेल्वेचे कामकाज कसे चालते ह्याची माहिती देण्यात आली. प्रत्यक्ष धावणाऱ्या रेल्वे पाहून विद्यार्थिनीना खूप आनंद झाला. रेल्वेच्या विविध नियमांची माहिती सुद्धा देण्यात आली. तसेच कोथरूड येथील तात्यासाहेब थोरात उद्यान मधील खेळांची मजा विद्यार्थिनींनी लुटली. सोबत शेंगदाण्याच्या लाडूचा आस्वाद सुद्धा घेतला.

पक्षी निरीक्षण

शुक्रवार दिनांक २२/१२/२०१७ रोजी मोठ्या गटाची सहल पक्षी प्रकल्पांतर्गत तळजाई टेकडी येथे नेण्यात आली. गुलाबी थंडीचा अनुभव घेत बदक, सनबर्ड, बगळा, कबुतर, सुतार पक्षी आणि विविध प्रकारचे पक्षी विद्यार्थिनींनी बघितले. तसेच पुस्तकांमधील पक्ष्यांच्या चित्राप्रमाणे पक्ष्यांचा शोध सुद्धा घेतला. त्यासाठी भिंगाचा वापरही केला. भटकंती करताना शेंगदाण्याच्या लाडूचा आस्वाद विद्यार्थिनींनी घेतला.

नाताळ

मंगळवार दिनांक १९/१२/२०१७ रोजी शिशुमंदिर विभागात नाताळ सण साजराकरण्यात आला. ख्रिसमस ट्री सजवण्यात आला. नाताळ सणाची माहिती दृक माध्यमातून सांगण्यात आली. तसेच नृत्य सुद्धा करण्यात आले. विद्यार्थिनींना भेटण्यासाठी सांताक्लॉज आला होता. खाऊ म्हणून विद्यार्थिनींना केक देण्यात आला.

भाजी मंडई

गुरुवार दिनांक १४/१२/२०१७ रोजी छोट्या गटाच्या भाजी प्रकल्पांतर्गत भाजी मंडई भरवण्यात आली होती. छोट्या गटाच्या विद्यार्थिनी भाजीवालीच्या पोषाखामध्ये आल्या होत्या. भाजी घ्या भाजी अशा आरोळ्या देत विद्यार्थिनी भाजी घेण्याचा आग्रह करत होत्या. मोठ्या गटामधील विद्यार्थिनी पालकांसोबत भाजी खरेदी करण्यासाठी आल्या होत्या. आर्थिक व्यवहाराचे ज्ञान होणे आणि भाज्यांची माहिती होण्याच्या उद्देशाने भाजी मंडई भरवण्यात आली होती.

वार्षिक स्नेहसंमेलन

मंगळवार दिनांक १२/१२/२०१७ रोजी शिशुमंदिर विभागाचे वार्षिक स्नेहसंमेलन अण्णाभाऊ साठे सभागृह येथे संपन्न झाले. ’रमते फुलांसावे’ हा फुलांवर आधारित कार्यक्रम विद्यार्थीनिंनी सादर केला. फुलांच्या गाण्यावर नृत्य, नाटिका, संगीतिका विद्यार्थीनिनी सादर केली. कार्यक्रमाचे वैशिष्ट्य म्हणजे कार्यक्रमाचे सूत्रसंचलन ५ ते ६ वर्षे वयोगटामधील विद्यार्थीनिनी केले. कार्यक्रमामध्ये सर्व विद्यार्थिनी सहभागी झाल्या होत्या.कार्यक्रमासाठी प्रमुख पाहुण्या म्हणून माननीय श्रीमती वंदना पाठक (महाराष्ट्र गर्ल्स एज्युकेशन सोसायटीच्या सभासद आणि शिशुमंदिर कात्रज शालेय समितीच्या अध्यक्ष) उपस्थित होत्या. तसेच कार्यक्रमासाठी माननीय श्रीमती श्यामा जाधव (महाराष्ट्र गर्ल्स एज्युकेशन संस्थेच्या अध्यक्ष ), माननीय श्रीमती उषा वाघ (महाराष्ट्र गर्ल्स एज्युकेशन संस्थेच्या उपाध्यक्ष), माननीय श्रीमती रेखा पळशीकर (महाराष्ट्र गर्ल्स एज्युकेशन संस्थेच्या सचिव), माननीय श्रीमती जयश्री बापट(प्रमुख विश्वस्थ),माननीय श्री.सोनवणी (महाराष्ट्र गर्ल्स एज्युकेशन संस्थेचे सभासद) उपस्थित होते. प्रमुख पाहुण्यांच्या हस्ते विद्यार्थीनीना प्रातिनिधिक स्वरूपात बक्षीस म्हणून पुस्तके देण्यात आली.

केशरी रंग दिन

बुधवार दिनांक २९/११/२०१७ रोजी छोट्या गटाचा केशरी रंग दिन साजरा करण्यात आला. सर्व विद्यार्थिनी आणि शिक्षिका केशरी रंगाचा पोषाख परिधान करून आल्या होत्या. केशरी रंगाच्या विविध वस्तूंची मांडणी वर्गामध्ये करण्यात आली होती. लाल आणि पिवळा रंगाचे मिश्रण म्हणजे केशरी रंग हे प्रत्यक्ष रंग एकत्र करून विद्यार्थींनी बघितले. सूर्यफुलाची कागदी अंगठी विद्यार्थीनींना देण्यात आली. केशरी रंगाच्या विविध कृतींचा आनंद विद्यार्थीनिनी घेतला.

दूध प्रकल्प मांडणी (मोठा गट)

गुरुवार दिनांक २३/११/२०१७ रोजी मोठ्या गटाच्या दूध प्रकल्पाची मांडणी करण्यात आली होती. दूध देणारे प्राणी, दुधाचे पदार्थ, दुधाचे उपयोग, दुधाचे आरोग्यासाठीचे महत्व अशी विविध माहिती देणारे तक्ते आणि साधने ह्याची मांडणी करण्यात आली. विद्यार्थिनींनी प्रत्यक्ष पालकांना माहिती सुद्धा सांगितली. पालकांनी प्रदर्शनाला भरघोस प्रतिसाद दिला.

बाग प्रकल्प (शिशुरंजन गट)

शनिवार १८/११/२०१७ रोजी बाग प्रकल्पांतर्गत शिशुरंजन गटाची सहल पु.ल.देशपांडे उद्यान सिंहगड रोड येथे नेण्यात आली होती. विविध खेळ जसे घसरगुंडी, झोका, जंगलजीम ह्यांचा आनंद विद्यार्थींनींनी घेतला. तसेच भटकंतीचाही अनुभव विद्यार्थिनींनी घेतला. क्रीमरोल खाऊ सुद्धा देण्यात आला. सोमवार ६/११/२०१७ रोजी वर्गामध्ये बाग प्रकल्पाची मांडणी करण्यात आली होती.

जंगली प्राणी प्रकल्प मांडणी (छोटा गट)

गुरुवार दिनांक १६/११/२०१७ रोजी छोट्या गटाचा जंगली प्रकल्पाची मांडणी करण्यात आली होती. प्राण्यांची घरे, खाद्ये, बाळे त्याची नावे अशी विविध माहिती देणारी साधने प्रदर्शनामध्ये मांडण्यात आली होती. पालकांनी विद्यार्थीनिंना घेऊन प्रदर्शनाला भेट दिली.

आकार दिन

बुधवार दिनांक ८/११/२०१७ रोजी शिशुमंदिरमध्ये आकार दिन साजरा करण्यात आला होता. विद्यार्थीनिंनी त्रिकोण, चौकोन, वर्तुळ, आयत अशा विविध आकाराच्या वस्तू आणल्या होत्या. त्याची वर्गामध्ये मांडणी करण्यात आली होती. रंगकाम, चिकटकाम अशा हस्त व्यवसाय कृती देण्यात आल्या. खेळाद्वारे विविध आकाराची ओळख विद्यार्थिनींना करून देण्यात आली. तसेच चौकोन, आयत ,वर्तुळ अशा आकाराची बिस्किटे खाऊ म्हणून देण्यात आली. अशाप्रकारे आकारदिन हा अतिशय वेगळा उपक्रम राबवण्यात आला.

कात्रज दूध डेअरी भेट

शनिवार दिनांक ४/११/२०१७ रोजी मोठ्या गटाच्या विद्यार्थिनींनी दूध प्रकल्पांतर्गत कात्रज येथील दूध डेअरीला भेट दिली. डेअरीमध्ये दूध आल्यानंतर केल्या जाणा-या विविध प्रक्रियांची माहिती देण्यात आली. दुधाचे पदार्थ तयार कसे करतात हे प्रत्यक्ष पाहता आले. विद्यार्थिनीचे आवडीचे आईस्क्रीम देण्यात आले.

राजीव गांधी प्राणी संग्रहालय भेट

शनिवार दिनांक ४/११/२०१७ रोजी छोट्या गटाच्या विद्यार्थिनींनी कात्रज येथील प्राणी संग्रहालयाला भेट दिली. जंगली प्राणी प्रकल्पांतर्गत ह्या सहलीचे आयोजन करण्यातआले होते. सिंह, वाघ, साळिंदर, साप, नाग, हत्ती, माकड असे विविध प्राणी प्रत्यक्ष पहायला मिळाले. खाऊ म्हणून क्रीमरोल सुद्धा देण्यात आला.

पालकसभा

गुरुवार दिनांक २/११/२०१७ रोजी पालक सभा आयोजित करण्यात आली होती. पालकसभेसाठी मार्गदर्शन करण्यासाठी डॉ.अनिल पानसे उपस्थित होते. वय वर्षे ३ ते ५ मधील मुलांचे आरोग्य ह्या विषयावर पालकांना डॉक्टरांनी मार्गदर्शन केले. तसेच पालकांच्या शंकांचे निरसन करण्यात आले. तसेच डॉ.सुषमा जलमकर ह्या सुद्धा पालक सभेसाठी उपस्थित होत्या. १०८ क्रमांक रुग्णवाहिका सेवेबद्दल माहिती डॉ.सुषमा जलमकर ह्यांनी प्रात्यक्षिकासह पालकांना दिली.

दीपोत्सव

बुधवार दिनांक ११/१०/२०१७ रोजी शिशुमंदिर विभागात दीपोत्सव साजरा करण्यात आला. विद्यार्थिनींनी मातीचा किल्ला तयार केला. शाळेच्या परिसरामध्ये सजावट करण्यात आली होती. रांगोळी, पणत्या लावण्यात आल्या. त्यामुळे शाळेचा सर्व परिसर उजळून निघाला. सर्व विद्यार्थिनी आवडीच्या पोशाखात आल्या होत्या. दिवाळीच्या गाण्यावर नृत्य सादर करण्यात आले. नाटुकल्याद्वारे विद्यार्थिनींनी फटाक्याविना दिवाळी साजरी करण्याचा संदेश दिला. दिवाळीच्या प्रत्येक दिवसाचे महत्व विद्यार्थिनींनी सांगितले. दिवाळीच्या प्रत्येक दिवशी काय-काय करतात हे वस्तूंच्या मांडणीद्वारे दाखवण्यात आले. शेवटी पुरी, छोले, श्रीखंड हे जेवण देण्यात आले. घरी जाताना प्रत्येक विद्यार्थिनीला रांगोळी-छाप भेट म्हणून देण्यात आला. अशाप्रकारे अतिशय उत्साहाच्या वातावरणामध्ये दिवाळी साजरी करण्यात आली.

कोजागिरी पौर्णिमा आणि पांढरा रंग दिन

गुरुवार दिनांक ५/१०/२०१७ रोजी कोजागिरी पौर्णिमा साजरी करण्यात आली. चांदोमामा ह्या गाण्यावर विद्यार्थिनींनी नृत्य सादर केले. सर्व विद्यार्थिनी पांढरा पोशाख परिधान करून आल्या होत्या. मोठ्या गटाचा पांढरा रंग दिन सुद्धा त्याच दिवशी साजरा करण्यात आला. पांढऱ्या रंगाच्या विविध वस्तूंची मांडणी करण्यात आली होती. त्याचप्रमाणे हस्त व्यवसायच्या विविध कृतीसुद्धा करून घेण्यात आल्या. घरी जाताना कागदाची हसरी चांदणी देण्यात आली. कोजागिरी निमित्त मसाले दुध देण्यात आले.

निळा रंग दिन

बुधवार दिनांक ४/१०/२०१७ रोजी शिशुरंजन गटाचा निळा रंग दिन साजरा करण्यात आला. विद्यार्थिनी आणि शिक्षकवर्गाने निळ्या रंगाचे पोशाख परिधान केले होते. विविध निळ्या रंगाच्या वस्तूंची मांडणी वर्गामध्ये करण्यात आली होती. तसेच विद्यार्थिनींनी अनेक वस्तूसुद्धा आणल्या होत्या. अशाप्रकारे निळ्या रंगाची ओळख विद्यार्थिनींनी करून देण्यात आली.

दसरा

शुक्रवार दिनांक २९/९/२०१७ रोजी दसरा हा सण साजरा करण्यात आला. विद्यार्थिनी आवडीच्या पोषाखामध्ये आल्या होत्या. विद्यार्थिनींनी नृत्याद्वारे देवीचा जागर सादर केला. तसेच खंडेनवमी निमित्त शस्त्रांचे पूजन करण्यात आले. विद्यार्थिनींच्या विविध साधनखेळांचे आणि सरस्वतीचे पूजन मुख्याध्यापिका श्रीमती उमा गोसावी ह्यांचा हस्ते करण्यात आले. विद्यार्थिनींनी पाटीचे पूजन करून प्रार्थना केली. तसेच नवरात्रउत्सवामध्ये गहू पेरून घेण्यात आले होते. ते गव्हांकुर विद्यार्थिनींनी खाण्यास दिले. त्याचे आरोग्याच्या दृष्टीने महत्व पटवून सांगितले.

भोंडला

बुधवार दिनांक २७/९/२०१७ रोजी शिशुमंदिर विभागात नवरात्र निमित्त भोंडला साजरा करण्यात आला. आवडीच्या पोशाखात विद्यार्थिनी शाळेत आल्या होत्या. हत्तीच्या छायाचित्राची मुख्याध्यापिका श्रीमती उमा गोसावी ह्यांच्या हस्ते पूजा करण्यात आली. विविध पारंपारिक गाणी म्हणून फेर धरण्यात आला. खिरापत म्हणून डोसा, बटाट्याची भाजी आणि जिलेबी हा विद्यार्थिनींच्या आवडीचा खाऊ देण्यात आला.

झाडे प्रकल्प प्रदर्शन (मोठा गट)

शनिवार दिनांक २३/९/२०१७ रोजी झाड प्रकल्पाचे प्रदर्शन भरवण्यात आले होते. झाडाचे विविध प्रकार, झाडाचे अवयव, झाडाचे विविध उपयोग ह्या संबंधित साधनांची मांडणी करण्यात आली होती. प्रदर्शनाचे वैशिष्ट्य म्हणजे पालकांच्या सहभागाने कागदी झाडांचे विविध प्रकार तयार केले होते. पालकांनी अतिशय आकर्षक झाडे तयार केली होती. तसेच प्रदर्शनामध्ये विद्यार्थिनींनी झाडाबद्दल माहिती सांगितली.

पावसाळा प्रकल्प प्रदर्शन (शिशुरंजनगट)

पावसाळा प्रकल्पांतर्गत शिशुरंजन गटामध्ये अध्यापनासाठी वापरण्यात येणा-या शैक्षणिक साधनांचे प्रदर्शन शनिवार दिनांक १६/९/२०१७ रोजी भरवण्यात आले होते. पावसाळ्यामध्ये वापरण्यात येणारे साहित्य पावसाळ्यात दिसणारे कीटक तसेच पाऊस कसा पडतो ह्याबद्दल माहिती देणाऱ्या साधनांची मांडणी प्रदर्शनात करण्यात आली होती. तसेच पावसाळ्याबद्दल माहिती देणाऱ्या ppt चे सादरीकरण करण्यात आले. पालकांचा उस्फुर्त प्रतिसाद लाभला.

वैद्यकीय तपासणी शिबीर

दरवर्षीप्रमाणे ह्यावर्षी सुद्धा शिशुमंदिर मधील सर्व गटातील विद्यार्थिनींची वैद्यकीय तपासणी गुरुवार दिनांक १४/९/२०१७ आणि शुक्रवार दिनांक १५/९/२०१७ रोजी करण्यात आली. शिबिराचे उद्घाटन पुणे महानगरपालिकेचे वैद्यकीय अधिकारी डॉ. दिनेश बेंडे ह्यांच्या हस्ते करण्यात आले. ३ ते ६ वर्षे वयोगटामध्ये असणाऱ्या विद्यार्थिनींची तपासणी अपूर्वा सामाजिक प्रतिष्ठान तर्फे करण्यात आली. तपासणीसाठी डॉ. सुहास शितोळे, डॉ. सुषमा जलमकर, डॉ. विलास टाकणे, डॉ. गणेश निंबाळकर, डॉ. दिलीप सूर्यवंशी उपस्थित होते. डॉक्टरांनी विद्यार्थिनींच्या आरोग्याबद्दल शिक्षकांशी संवाद साधला.

लाल रंग दिन

बुधवार दिनांक १३/९/२०१७ रोजी शिशुरंजन गटामध्ये लाल रंग दिन साजरा करण्यात आला. सर्व विद्यार्थिनी आणि शिक्षक लाल रंगाचा पोशाख परिधान करून आल्या होत्या. तसेच वर्गात लाल रंगाच्या वस्तूंची मांडणी करण्यात आली होती. अनेक विविध लाल रंगाच्या वस्तू विद्यार्थिनींनी घरून आणल्या होत्या. खाऊ म्हणून टोमॅटो देण्यात आला. आकारात ठसेकाम कृती घेण्यात आली. घरी जाताना लाल रंगाचे कागदी फुल ड्रेसला लावून देण्यात आले.

घरे प्रकल्प प्रदर्शन (छोटा गट)

घरे प्रकल्पांतर्गत छोट्या गटामध्ये अध्यापनासाठी वापरण्यात येणाऱ्या शैक्षणिक साधनांचे प्रदर्शन बुधवार दिनांक १३/९/२०१७ रोजी भरवण्यात आले होते. घरांच्या विविध प्रकारापासून ते बांधकामासाठी लागणाऱ्या साहित्यापर्यंत साधनांची मांडणी करण्यात आली होती. तसेच घरांच्याबद्दल माहिती देणाऱ्या ppt चे सादरीकरण करण्यात आले. यासाठी पालकांचा उस्फुर्त प्रतिसाद लाभला.

वर्षा विहार

येरेयेरे पावसा, तुला देतो पैसा पैसा झाला खोटा, पाऊस आला मोठा शुक्रवार दिनांक ८/९/२०१७ आणि शनिवार दिनांक ९/९/२०१७ रोजी मोठ्या गटाच्या अभ्यासक्रमातील पाणी प्रकल्पांतर्गत विद्यार्थिनींना वर्षाविहारासाठी पानशेत येथे नेण्यात आले. खडकवासला, पानशेत, वरसगाव धरण दाखवण्यात आले. श्री. ल. म. कडू (लेखक, चित्रकार, प्रकाशक) ह्यांनी विद्यार्थिनींशी संवाद साधून विविध उपयुक्त औषधी झाडांची माहिती दिली. त्यांचे वैशिष्ट्य सांगितले. शेण आणि माती मिसळून त्यामध्ये बिया घालून तयार करण्यात आलेले छोटे चेंडू विद्यार्थिनींनी डोंगरावर टाकून ‘झाडे लावा, झाडे जगवा’ संदेश सुद्धा दिला. तसेच नांगरणीचा अनुभवही विद्यार्थिनींनी घेतला. सोबत जेवणाचा आस्वाद घेतला. वय वर्षे ५ ते ६ वयोगटातील विद्यार्थिनींना मिळालेला हा अनुभव अद्वितीय ठरला.

पाणी प्रकल्प ( मोठा गट )

गुरुवार दिनांक २०/७/२०१७ रोजी ‘पाणी’ या विषयावर प्रकल्प मांडणी करण्यात आली. पाण्याचे उपयोग, पाणी स्त्रोत, पाणी शुद्धीकरण, पाणी प्रदुषण या माहितीचा समावेश करण्यात आला होता. विविध साधने, चित्रे मांडणी पाहण्यासाठी पालक उपस्थित होते. विद्यार्थीनींनी पाणी प्रकल्पाबद्दल माहिती पालकांना दिली.

पालकसभा

शाळेमध्ये राबवण्यात येणारे विविध प्रकल्प तसेच शिकवण्यात येणारे विषय याबद्दल पालकांना माहिती व्हावी या उद्देशाने गुरुवार दिनांक ६/७/२०१७ रोजी मोठ्या गटाची, शनिवार दिनांक ८/७/२०१७ छोट्या गटाची आणि शनिवार १५/७/२०१७ रोजी शिशुरंजन गटाची पालक सभा आयोजित केली. पालकांना प्रात्यक्षिकाद्वारे अध्यापनाच्या विविध पद्धतींची माहिती देण्यात आली. प्रकल्प पद्धत, अक्षरवळण, अंकओळख, गाणी, गोष्ट, जीवनव्यवहार, इंद्रिय विज्ञान, गणिती संकल्पना अशा विषयांची साधनाद्वारे माहिती देण्यात आली.

स्वागत समारंभ

बुधवार दिनांक १२/७/२०१७ रोजी स्वागत समारंभ करण्यात आला. शिशुरंजन आणि छोट्या गटातील नवीन प्रवेश घेतलेल्या विद्यार्थिनींचे स्वागत मोठ्या गटातील विद्यार्थीनींनी केले. चिकटकाम, रंगकाम याद्वारे शोभेच्या वस्तू मोठ्या गटातील विद्यार्थिनींनी तयार केल्या आणि नवीन विद्यार्थीनींना भेट म्हणून दिल्या. मोठ्या गटातील विद्यार्थिनींनी नृत्य सादर केले. तसेच सँडविच तयार करून खाऊ म्हणून दिले.

वारी विठ्ठलाची

सोमवार दिनांक २/७/२०१७ रोजी विठ्ठलाच्या नामघोषात पालखी काढण्यात आली. वारक-याच्या पोशाखात आलेल्या विद्यार्थिनींनी वाहतूक नियमनाचा संदेश दिला. पालखीसोबत सायकल रॅली शाळेच्या परिसरात काढण्यात आली. तसेच दृकश्राव्य ( ppt ) साधनाद्वारे माहिती सांगण्यात आली.

रमजान ईद

बालवयात सर्वधर्म समभाव हे मूल्य रुजवण्याच्या उद्दिष्टाने मंगळवार दिनांक २७/६/२०१७ रोजी शिशुमंदिर मध्ये रमजान ईद हा सण साजरा करण्यात आला. छोटया गटातील विद्यार्थिनींनी माहिती सांगून नृत्य सादर केले. एकमेकांना शुभेच्छा सुद्धा दिल्या. शिरखुर्मा खाऊ म्हणून देण्यात आला.

शाळेचा पहिला दिवस

गुरुवार दिनांक १५/६/२०१७ रोजी छोटा गट, सोमवार दिनांक १९/६/२०१७ रोजी मोठा गट आणि शुक्रवार दिनांक २३/६/२०१७ रोजी शिशुरंजन गटाची शाळा सुरु झाली. शाळेमध्ये राबवले जाणारे विविध प्रकल्प आणि शाळेबद्दल माहिती पालकांना सांगण्यात आली. तसेच छोट्या गटातील पालकांना पाहण्यासाठी विविध साधन खेळांची मांडणी करण्यात आली होती. मोठ्या गटातील पालकांनी पाल्याबरोबर फिंगर पपेट तयार करून गाणे म्हटले. शिशुरंजन गटातील पालकांनी आपल्या पाल्याबरोबर ठसेकाम ह्या कृतीचा आनंद लुटला. घरी जाताना भेट म्हणून रुमाल आणि खाऊ म्हणून सुकामेवा देण्यात आला. शिशुरंजन गटातील विद्यार्थिनींना भेट म्हणून खेळ देण्यात आला.

शिक्षक प्रशिक्षण ( पपेट तयार करणे. )

मंगळवार दिनांक १३\६\२०१७ आणि बुधवार दिनांक १४\६\२०१७ रोजी कात्रज विभागातील शिक्षकांसाठी पपेट्स बनवणे हे प्रशिक्षण आयोजित करण्यात आले होते. प्रभावी अध्यापनासाठी प्रशिक्षणाचा उपयोग शिक्षकांना होणार आहे. माननीय श्री. प्रदीप वाघमारे ( scert चे कर्मचारी ) यांना प्रशिक्षण देण्यासाठी निमंत्रित करण्यात आले होते. कागदी पक्षी बनवणे, स्टिक पपेट, हँडपपेट, कळसूत्री बाहुल्या बनवणे आणि त्यांचा वापर करण्याच्या पद्धतींचा वापर प्रात्यक्षिकातून देण्यात आला. कमीतकमी वेळात आणि कमीतकमी खर्चात आकर्षक साधने बनविण्याचे प्रशिक्षण शिक्षकांना देण्यात आले.

शिक्षकांचे प्रशिक्षण ( फुले तयार करणे. )

सोमवार दिनांक १२\६\२०१७ रोजी शिशुमंदिर शिक्षकांसाठी प्रशिक्षण आयोजित करण्यात आले होते. विविध प्रकारची कागदी फुले बनविण्यास शिकविण्यात आले. प्रशिक्षण देण्यासाठी माननीय श्रीमती सुवर्णा अवचट उपस्थित होत्या. जास्वंद, गुलाब, झेंडू यासारखी विविध प्रकारची आकर्षक फुले शिक्षकांनी तयार केली. प्रशिक्षणामध्ये बनविलेल्या फुलांचा उपयोग शाळा सुशोभन आणि शाळेच्या इतर उपक्रमामध्ये होणार आहे.